واحد راح صالة حديد وقال للمدرب انا لسه جديد وعاوز العب حديد
المدرب قاله سبلي نفسك خالص وانا في خلال كم شهر هعمل منك بطل
قاله ماشي
المدرب قاله شيل البار ده .. ده خمسة كيلو
صاحبنا شاله .. كان حاسس بتعب في الاول بس مع المحاولات قدر يشيله لحد ماتعود عليه
تاني اسبوع خلاه يشيل عشرة
تالت اسبوع خلاه يشيل عشرين
رابع اسبوع ... خامس اسبوع .... وهكذا لحد مافات حوالي شهر وصاحبنا بقي بيشيل اكتر من 50 كيلو
صاحبنا وهو نازل من الصاله لقي راجل عجوز مش قادر يشيل الأنبوبه وبيدور علي حد يشلهاله
راح شالها للعجوز بإيد واحده وطلعهاله لحد البيت
الراجل شكره وصاحبنا مشي وهو فرحان علشان قدر يساعد محتاج
ولولا التدريبات مكنش قدر يساعده
ربنا كده بردو ياولاد .. بيدربنا من دلوقتي في الحياة
مرة يدينا هم صغير وهو اللعبة بتاعتي اتكسرت وعاوز واحده جديده
ومرة يووووه الدرس ده صعب ومش عارف اذاكره بس لازم
ومرة يالهووووي صاحبي اشتغل بمرتب اكبر مني مع انه خريج نفس كليتي
ومرة اوبا حبيبتي طارت مني ومش قادر اعيش من غيرها
ومرة .... ومرة ...... كل لما تكبر كل لما تزيد همومك
علشان تقدر تشيل اسرة كامله جوه عنيك
لو انت ضعيف هتغرق وهيغرق معاك زوجه واطفال
يبقي كل هم تمر بيه في الحياة ثق انه بيقويك مش بيضعفك
ومتنسوش لولا ان الراجل اتدرب وكل يوم شال حمل اتقل من اللي بعده مكنش قدر يساعد العجوز
وهكذا لولا همومك اللي بتمر بيها من دلوقتي مش هتقدر تساعد اسرتك اللي هتكونها .. في انك تتحمل مسئوليتهم وتشيل همومهم وتحلها
مع كل هم افتح ايدك واشكر ربك وقوله يارب قويني اني اقدر اشيله واستحمل الهم اللي بعده ....
احكيها لطفلك في الخدمة ... ربنا معاكم ..